Le Mans, le 21 février 2021                                                          

Ry rahavavy malala, ry havana aman-tsakaiza

Toy ny isan-taona ny vanim-potoan’ny Karemy dia miantso antsika ho hibebaka sy hanovo ao am-pon’Andriamanitra ny hery hitia tahaka ny nitiavan’i Jesoa antsika.

Safidin’Andriamanita ny mitia, na inona na inona zava-mitranga

Tsy misalsala Andriamanitra maneho ny fitavany antsika tamin’ny nanirahany ny Zanany taty amintsika na dia fantany fa mety ho voailika Izy. Ny fanetra-tenan’i Jesoa, naka ny toetantsika olombelona ary maty teo amin’ny hazofijaliana dia fihetsika feno fanetren-tena izay maneho ny halehiben’ny Fitiavan’Andriamanitra, na dia eo aza ny fandavana sy ny tsy fandraisana Azy.

“Ny fitiavan’ny Ray dia tsy mitady tambiny amin’ny olombelona. Tsy manam-petra ny fitiavany, efa tia antsika mialoha Izy koa na inona na inona ny valin-tenintsika dia tia antsika hatrany Izy…  Tsy manampatra fahefany na manery antsika ho tia Azy Andriamanitra Ray fa kosa manaja ny safidintsika lalandava... 

Asehon’Andriamanitra ny tena endriny be fahefana amin’ny alalan’I Jésoa miondrika manasa ny tongotry ny mpianany sy amin’alalan’i Jesoa eo amin’ny Hazofijaliana, izay toa tsy mahefa na inona na inona intsony.  Tsy manameloka izy fa maneho ny fitiavany hatrany. Ny fahefan’Andriamanitra Tsitoha dia fahefan’ny fitiavany tsy misy fiarovan-tena…”

Du Livre « Sa Tendresse est inépuisable » de Jean Civelli

Raha jerena ny tantaran’ny fijalian’i Jesoa, dia hitantsika fa tsy niteny na niloa-bava Izy, tsy niaro-tena fa nangina fotsiny manoloana ireo fandavana sy herisetra nihatra taminy . Tsy nanameloka Izy fa nitalaho famelan-keloka ho an’ireo izay nanao ratsy taminy... Ny hany fahefany sy fiarovany dia ny mitia sy manolo-tena hatramin’ny farany noho ny fitiavana.

Ny lalam-panorentsika dia manasa antsika mibanjina Ilay Zanak’Andriamanitra naka ny toetra maha-mpanompo mba hitarika antsika tsikelikely amin’ny fanetren-tena : fahamarinana eo anatrehan’Andriamanitra, eo anatrehan’ny namana ary eo anatrehan’ny tenanantsika. Ary hoy Mamera Marie-Madeleine amintsika: Maka tahaka ny fahalemem-panahy, fanetren-tena, faharetana, fahazotoana tanteraka hita ao amin’ny Fon’i Jesoa mijaly.                                                                        Jer.Lalam-panorenana n°5

Banjinontsika ao amin’i Jesoa ny tena endrik’Andriamanitsika, Ilay Andriamanitra manetry tena sy tsy misehoseho ary manolo-tena noho ny fitiavana. Aoka isika hanana fahasahiana hiaina ny tena fitiavana marina, ny fanetren-tena sy ny tsy fisehosehoana, zay mahatonga  antsika hifanahaka Aminy, tsy mitady fiarovan-tena.

Fifadian-kanina, vavaka ary fiantrana

Izao no vakintsika ao amin’ny taratasin’i Papa François momba ny Karemy 2021:

“Ny fifadian-kanina, ny vavaka ary ny fiantrana, araka ny fampianaran’i Jesoa (jer.6,1-18) dia toe-piainana sy fomba entintsika maneho fibebahana. Ny fahantrana sy ny tsy fahampiana (ny fifadian-kanina), ny fijery feno fangorahana sy ny fihetsika maneho fitiavana ho an’ny olona voaratra (fiantrana), ary fifandraisan’ny zanaka amin’Andriamanitra Ray (vavaka), dia mahatonga antsika hanana finoana matotra, fanantenana velona ary fitiavana arahina asa.

Ny fifadian-kanina, fahatrana sy tsy fahampiana…

Ny fifadian-kanina dia mety ho zavatra hafa ankoatry ny fihafiana amin’ny zavatra tiantsika… Araka voalazan’i Papa François: “ny fifadian-kanina dia manampy antsika ho tia an’Andriamanitra sy ny namana”. 

Ny fifadian-kanina dia mety ho famolahan-tena mba hiala amin’ny fahazarana mitsara ny hafa, mba hiala amin’ny fomba fijery ny hafa izay tsy manampy azy hiova sy hivelatra… Ny fifadian-kanina dia mety ho famolahan-tena mba hiala amin’ny fahazarana mampisongadina hatrany ny ratsy, izay mitarika amin’ny fitsikerana manimba, mba hiala amin’ny fiheverana  ny tena ambony noho ny hafa… Io fifadian-kanina io no ahatsapantsika ny tsy fahampian’ny fitiavana sy fahamarinana ao amintsika sady manokatra ny fontsika amin’Izy Tompo izay  manatona antsika: Ilay mahantra amin’ny zavatra rehetra nefa «  feno fahasoavana sy fahamarinana » Jn1,14.  Tahaka  voalazan’i Papa François ihany koa : “ny fifadian-kanina dia manafaka antsika amin’izay rehetra mangeja antsika…”

Ny fiantrana, ny fijery feno fangorahana ary fihetsika maneho fitiavana ho an’ny olona malemy sy osa… Ny fiantrana dia mety ho zavatra hafa ankoatry ny fizarana amin’ny mahantra ny vokatry ny fihafiana izay nataontsika… Ny fiantrana dia mety  ho fanehoana hahankatom-pijery, fankaherezana sy fanomezan-danja ary fangorahana ny hafa… Samy osa sy malemy isika ka mila fijery, fiteny sy fihetsika izay mampitraka antsika.

Ny vavaka, fifampiresahan’ny zanaka amin’Andriamanitra Ray…   Eo amin’ny zava-miseho sy mitranga rehetra dia tsy tapaka mitodika sy mifandray amin’Andriamanitra Ray i Jesoa mba hampifanaraka ny fiainany manontolo amin’ny sitrapon’ny Rainy. 

Tao anatin’ny fijaliana, dia niaina tsy tapaka ny fifandraisany marina tamin’ny Rainy Izy:

Raiko ô, raha azo atao, aoka hesorina amiko ity kapoaka ity, kanefa aoka tsy ny sitra-poko no ho tanteraka, fa ny anao. Mt,26,39

Andriamanitro, Andriamanitro, nahoana no dia nilaozanao aho ? Mt27,46 ;Mk 15, 34

Raiko, avelao ny helony, fa tsy fantany izay ataony. Lk,23,34

Raiko ! eo an-tananao no ametrahako ny fanahiko. Lk 23,46

Midira ao amin’ny vavak’i Kristy mba hifanaraka amin’ny sitrapon’ny Ray ny fiainantsika, mba hanambara Aminy ny tebiteby sy ny ahiahim-pontsika, ny fanontaniantsika, ny fahoriana mampitaraina antsika. Mba ho afaka handray sy hanome famelan-keloka ary hametraka ny fiainantsika eo am-pelatanany.

Ny fitsangan-ko velona dia mitory ny fandresen’Andriamanitra noho ny fitiavana. Fandresen’ny tsy fivadihana telo ihany ko any fitsangan-ko velona : ny an’ Andriamanitra Ray izay tsy nandao an’i Jesoa tamin’ny fahafatesany, ny an’i Jesoa izay tsy nandao an’ireo mpiantra tamin’izy ireo nivadika taminy, ary ny an’ireo vehivavy  nankany amin’ny fasana maraina be, izay nalahelo tamin’ny voalohany, nefa feno fahatokisana taty aoriana satria tsapan’izy ireo fa eo mandrakariva ilay fitiavan’I Jesoa tsy mivadika. Nandresy ny fahafatesana Izy.     

Enga anie ny fitiavana sy ny fanetren-tena an’ilay Andriamanitsika hanenika tenantsika tsirairay avy.  i Kristy tafa-tsangan-ko velona anie ho fahazavana sy fanantenana ho antsika.                         Soeur Josette