Sampankazo, 5 avril 2020

Ry rahavavy sy ireo tapaka sy namana,

Tsy toy ny mahazatra ny fankalazantisika ny Herinandro Masina amin’ity taona ity … ao anatin’ny fihibohana… ary ho an’ny sasany amintsika aza ao anatin’ny fitokana-monina tanteraka izay mavesatra tokoa. Tsy misy fifandraisana amin’ny olon-kafa intsony, afa-tsy amin’ireo mpitsabo izay homentsika fisaorana manokana amin’ny fo manontolo noho ny fahavononany sy ny fahafoizan-tenany ary ny fitiavany. Ny fiarovan-tena sy ny fiarovana ny hafa no baiko manentana ny rehetra hatrany hatrany.

Eo amin’ireo zavatra mifamahofafo ireo no hankalazantsika ny Fijalian’ny Tompo sy ny Fitsanganany ho velona, ao anatin’ny fahanginana. Ny Papa François dia nankalaza ny alahadin’ny Sampankazo teo amin’ny kianjan’i Md Piera, izay toy ny efitra tsy misy olona mihitsy, …. Tao amin’ny toriteniny dia hoy izy : … ny loza izay iainantsika ankehitriny dia manosika antsika hifantoka amin’izay tena zava-dehibe ka tsy ho variana amin’ny zavatra tsy misy dikany,  mba hahatsapantsika indray… fa ny Fitiavana no tena manome lanja ny fiainana. Koa amin’izao Herinandro  Masina izao, ao an-tranontsika, dia aoka isika mitodika amin’i Jesoa voafantsika  – banjino, banjino ilay Voafantsika ! – faratampon’ny fitiavan’Andriamanitra antsika.

Banjino i Kristy izay irery tokoa eo anatrehan’ny fijaliany :  niady irery izy teo an-tendrombohitr’ôliva ary tao anatin’izany dia mitodika tamin’ny Ray nanao hoe : Tsy ny sitrapoko fa ny Anao … Nandao Azy ny mpianany … Nivadika taminy i Piera… nahatsapa fa toa mangina Andriamanitra : Andriamanitra ô, Andriamanitra ô, nahoana no dia nilaozanao Aho, dia nametraka tanteraka ny tenany teo am-pelanan’Andriamanitra Izy : Ray ô, eo am-pelatananao no ametrahako  ny fanahiko…  Ho an’i Kristy ny fanirery no toerana iatrehany, amin’ny maha-olombelona azy, ny adin-tsainy sy ny fisalalana, sady toerana ifandraisany amin’ny Ray, toerana izay manamafy ny fanoloran-tenany sy ny fitokisany an’ Andriamanitra. Enga anie isika hiaina izany fanirery izany miaraka amin’i Kristy mba hahafahantsika mitondra am-bavaka ireo rehetra voatery mihiboka noho izao krizy ara-pahasalamana maneran-tany izao. Ankinintsika  amin’Andriamanitra Ray  izy ireo.

Eo amin’ny fibanjinantsika an’i Kristy mijaly no hahafahantsika miombona amin’ireo rehetra mijaly eo amin’izao tontolo izao : ireo marary izay tsy eo anilan’ireo havana aman-tsakaizany, ireo fianakaviana namoy havana akaiky nefa tsy afaka nanatrika na nanao veloma farany azy ireo akory. Matokia fa ny herin’ny vavaka ataontsika sy ny fiombonantsika am-panahy dia mipaka hatrany any amin’izy ireo  sy mankahery azy ireo. 

Na dia eo aza izany rehetra izany, i Kristy dia tsy mivadika amin’ny toky nomeny mba eo anilantsika isanandro isanandro. Amin’ny alalan’izao fankalazana ny Misterin’ny Paka izao  dia te-hamelona  ny fisiany eo anivon’ny fiainantsika Izy. Izao zava-misy iainantsika izao dia mety hahakivy, hampitebiteby, hampametra-panontaniana antsika, tahaka an’ireo mpianatra avy any Emaosy…  nefa misy fotoana ihany koa hahatsapantsika fa Teny avy amin’ny Soratra Masina no afaka manome antsika indray ny fiadanam-po sy ny fitoniana ary hery vao. Eny, miara-dalàna amintsika i Kristy amin’izao zava-tsarotra sedraintsika izao… te hamelona ny finoantsika Izy mba hahafahantsika mahita sy mahalala Azy ao anatin’ny zava-miseho rehetra. Ny Fisiany sy ny Teniny no loharano anovozantsika hery sy fahazavana ary fanantenana izay ilaintsika.

Na eny an-dalana na ao am-pihibohana na any am-pitokana-monina dia afaka mihaona amin’ilay Kristy nitsangan-ko velona mandrakariva isika. Manatona antsika Izy eny amin’ny toerana rehetra misy antsika. Velona Izy ! Ny Fisiany eo anilantsika sy ny Teniny no mamelona sy manome hery antsika mandrakariva. Eo amin’izany fihaonana amin’i Kristy sy ny fihainoana azy, enga anie ho afaka miteny tahaka ireo mpianatra avy any Emaosy isika manao hoe : Akory ny firehidrehitry ny fontsika tamin’izy niresaka tamintsika… ary avelao manakoako ao anatintsika ny fiantsoany antsika mba hiaina ny fiainany sy hijoro ho vavolombelon’ny fisiany na inona na inona ireo zavatra miseho.

Mirary hafaliana, fiadanana ary fitoniana ao amin’i Kristy nitsangan-ko velona.

Miombom-po tanteraka aminareo

Soeur Josette Bijloos