Alahadin’ny sampankazo

14 avril 2019

Rahavavy malala,

Fiandohanan’ny fankalazana ny herinandro masina ity alahadin’ny sampakazo ity, dia aoka isika hiditra lalindalina kokoa ao amin’ny misterin’ny fitiavan’Andriamanitra niseho tao amin’ny Zanany izay nanolo-tena ho antsika.

Jesoa, ilay feno fitiavana sy hatsaram-panahy dia nosamborina sy nohelohina ho faty.  Ny toetrany manontolo dia toa manelingelina an’ireo manam-pahefana. Hatramin’izao, mbola mitohy io fananararaotam-pahefana io. Maro ireo olona tsy manan-tsiny, ireo osa sy tsy misy mpiahy, ankizy, zokiolona, ny vitsy an’isa, vehivavy, olona manana fahasembanana no atao tsinontsinona, hararaotina sy hanaovana herisetra… Tsy tompon’ny teny farany anefa ny fahefana. I Jesoa, ilay Zanak’ondry  nopotehina noho ny herisetra dia nanolotra ny ainy mba hanome aina antsika …. Entrer dans le mystère de Jésus, une lecture de l’Evangile de Jean’ de Jean Vanier.

Ny fibanjinana ny Tompo, Ilay fototry ny fiainantsika sy ny fitiavany izay niafara tamin’ny fanolorany tenany ho antsika tsirairay avy dia manazava ny dingam-piainana sy ny zavatra rehetra iainantsika sy iainan’ireo anadahy sy rahavavintsika.

Ny aiko, tsy misy maka azy amiko, fa ny tenako ihany no mahafoy azy….

Jean 10,18

Tsy ny fijaliana na ny lakroa no mamonjy… fa ny  fitiavana ihany. Mba handeha hatramin’ny fara-fitiavany ho antsika i Jesoa, dia voatery nandalo tamin’ny hazofijaliana izy noho ny fandavan’ny fon'ny olombelona. Ao amin’ny tsy fivadihany amin’ny sitrapon’ny Ray sy ny fifandraisany Aminy no nahazoany ny hery ilaina rehefa nolavina,  nilaozana ary novonoina izy…. Na teo anatrehan’ny haratsian’ny olona aza dia tsy nisy afaka nanesotra ny ainy fa Izy no nanolotra azy am-pitiavana.

Ny fiainantsika sy ny tena fitiavana marina dia tsy maintsy andalovan’ny fisedrana sy fijaliana... Eo anivon’ireo dia voaantso isika haka tahaka an’i Kristy mba hanolotra ny tenantsika sy ny aintsika noho ny fitiavana

Ny fijaliana dia  zavatra mila andalovana no miserana   Pape François

Tamin'ny fotoanan’ny Anjelisy, ny alahady faharoa tamin'ny Karemy, hoy ny Papa François: Ny fiovan’i Kristy tarehy dia tanteraka tamin'ny fotoana manokana eo amin’ny asa nanirahana azy, izany hoe taorian'ny nanambarany tamin'ny mpianatra fa tsy maintsy hijaly mafy Izy ... Amin'izany ny fiovan-tarehy dia maneho  ny fomba fijery kristianina momban’ny fijaliana. Tsy “safidy ny mijaly”, fa zavatra mila andalovana no miserana ny fijaliana sy fahoriana. 

Eo amin’ny fampisehoany ny voninahiny te-hanamafy amintsika i Kristy fa ny hazofijaliana sy ny fitsapana ary ny  zava-tsarotra iainantsika dia ahitana vahaolana ao amin’ny misterin’ny Pakany.

Indro eo aminareo mandrakariva aho. Matio 28,20

Tahaka an’ireo Mpianatra nankany Emaosy, manatona antsika i Kristy nitsangan-ko velona, eo amin’ny toerana sy dingana misy antsika : na ao anatin’ny fisalasalana, na velom-panontaniana isika, na faly na malahelo isika, na  velom-panantenana na diso-fanantenana isika, na ao amin’ny fetra sy fahalamentsika. Ao anatintsika lalina ao no ahatsapana ny fisian’i Kristy tafatsangan-ko velona, izay loharanon’ny fiaianana sy fahazavana.

Manatona sy miara-dalana amin’ny Fiangonany, ny Fiangonantsika koa i Jesoa nitsangan-ko velona, tamin’izao fotoan-tsarotra izao izay feno fanafitohinana. Manatona antsika Izy ao anatin’ny fijaliana, izay fanadiovana ho an’ny Fiangonana manontolo mba hahitana ny marina.

Ao amintsika tsirairay dia misy ny toetran’i Jodasy izay mitady fahefana sy mankahala ny fitiavana, misy ny toetran’i Piera izay tsy mety manaiky fa manana fahalemena i Kristy Mpamonjy, misy ny toetran’ireo mpitondra fivavahana sasany voafatotry ny ara-bakiteny sy ny lalàna ka tsy afaka mandray sy manaiky ny fihavaozan’ny Fanahy Masina, misy ny toetran’i Pilaty  izay matahotra ny fifanoherana sy fanamelohana manoloana an’ireo manam-pahefana romanina. Isika rehetra dia samy afaka mandratra ireo osa sy ireo tsy manantsiny izay manelingelina na manohitohina antsika. Saingy ao amintsika tsirairay ihany koa ny toetran’ny mpianatra malala izay manasa antsika hitia.  Entrer dans le mystère de Jésus, une lecture de l’Evangile de Jean’ de Jean Vanier.

Amin’izao fotoan’ny Paka izao, mamela an’i Kristy tafatsangan-ko velona manatona antsika. Henointsika ny feony miantso antsika amin’ny anarantsika.  Kolokolointsika, ao anatintsika ao, ny toetran’ny mpianatra malala izay miangavy antsika hiaina ny fitiavana.

Jesoa, miara-dalana aminay ianao, fahazavana manilo ny dianay

Eo aminay mandrakariva ianao, na dia misy fotoana heverinay fa toa tsy ao ianao.

Ao am-ponay no tianao hitsangana ho velona mba hitory ny tenanao

amin'izao tontolo izao.

Ianao, Ilay nitsangan-ko, dia maniraka anay ho any amin'ireo rahalahy sy rahavavinay ... araky ny fitsimbinan’Andriamantra

Mirary Paka Sambatra sy feno hafaliana ao amin’i Kristy tafatsangan-ko velona ho antsika rehetra

Soeur Josette BIJLOOS