8/12/2018

         Ry havana aman-tsakaiza,          Ry rahavavy malala,

      Fanantenana, hafaliana sy Fiadanana ! Ahoana ny akon’ireo ireo teny ireo ao anatintsika sy ao amin’ireo manodidina antsika  ankehitriny ? Mbola inoantsika ve fa azo iainana ireo ?

Marary ny tontolo misy antsika ary tena misy marina ireo zavatra mampitomany, mahadiso fanantenana na mahakivy : mitranga etsy sy eroa ny herisetra  … Tsy voaray ary voahiliky ny fiaraha-monina ireo olona mijaly noho ny zava-misy ao amin’ny firenena niaviany ary tonga mitady fialofana amin’ny firenen-kafa…  Miha-simba koa ny tontolo iainana… Miaraka amin’i Papa François dia tsapantsika fa,  raha ny fiainana ao anaty no mikombona, manao salobonkomana, dia tsy misy toerana ho an’ny hafa intsony, indrindra ho an’ny mahantra, tsy heno intsony ny feon’Andriamanitra, tsy mahatsapa intsony ny hamamin’ny fitiavany, tsy mirehidrehitra intsony ny hafanam-po hanao ny tsara (Hafalian’ny Evanjely n°2)

Kanefa amin’izao  vanim-potoana ny Fihaviana dia misy teny fampanantenana manohina antsika. Hoy ny Tompo amintsika : Indro avy ny andro izay hanatanterahako ny teny soa nolazaiko tamin’ny vahoakako… hampitsimoka solofo marina ho an’i Davida aho, izay hitsara araka ny hitsiny sy ny rariny (Jr33,14-16)… Ny Tompo hamafa ny ranomaso amin’ny tava rehetra…(Izaia 25,8)

Ny Fihaviana sy ny vanim-potoan’ny Noely dia miantso antsika hibebaka sy hanana finoana latsa-paka  mba ho vonona handray ny hafaliana izay atolotra Andriamanitra antsika. Ny hafalian’ny kristianina dia safidy tokoa : mila mikolokolo azy, mila hanapa-kevitra hiaina azy, ary hisafidy ny hitoetra ao amin’ny hafaliana, satria isika rehetra dia samy ao amin’ny fitiavan’Andriamanitra Ray tsy manam-petra ary samy novonjen’i Kristy sy nahafahany.  Tsy afo mololo ny hafalian’ny Kristianina, tsy fietseham-po fa hery tsy hay tohaina mba hampitodika amin’ny hafa.

Eo anatrehan’ ny fikorontanan’ny tontolo misy antsika, ny hafaliana Kristianina dia tsy atao hoe tsy mijery ny zava-misy… Miresaka mikasika hafaliana sy vazivazy (humour) ny Papa François ao amin’ny fanambarana Apostolika  « Gaudete et exsultate, toko faha-4 momban’ny fahamasinana ilain’izao tontolo izao ankehitriny,. Izao no voalazany :  Ny olomasina dia afaka miaina an-kafaliana... Mahita ny tena zava-misy izy fa hanampy ny hafa hanana hakantom-pijery feno fanantenana. (No 122)…  Misy fotoan-tsarotra,  fotoanan'ny hazofijaliana, saingy tsy misy afaka manimba ny hafaliana lalina izay miseho amin’ny fomba maro samihafa araky ny zavatra iainana. Mitoetra mandrakariva izy, na dia toy ny jiro kely milopilopy izay vokatry ny fahatsapana manokana fa tian’Andriamanitra aho, amin’ny fitiavana tsy manam-petra, na inona inona miseho, na inona inona mitranga. Andry iankinana tokoa izany ary mampitsimoka fiadanam-po feno fanantenana ka manome hafaliana ara-panahy izay tsy azon’izao tontolo izao heverina.(No. 125)

Mba ho afaka miaina izany hafaliana ao anaty izany, dia tsy maintsy mamela ‘ny misterin'Andriamanitra miara-monina amintsika’ hanova ny fomba fijerintsika mba hahafahantsika mamantatra fa tena eo anivon’ny fiainantsika sy izao tontolo izao Izy ary miasa tokoa. Ary marina izany, satria ao amin’ny zavatra rehetra izay heverintsika ho toa faran’izay tsy masina indrindra ao amin’ny fiainantsika no ihaonantsika amin’Andriamanitra. Ao amin’ny farany lalina indrindra, ao amin’izay mambabo antsika indrindra amin’ny maha olombelona antsika miaraka amin’ny fahalemeny sy ny havesarany … Tonga olombelona Andriamanitra mba haninteraka ny maha olombelona ny olombelona manontolo ny fiainany. (Boky Fiainam-panahy P.48)

Ny hafaliana dia fanomezana avy amin’ny Fanahy Masina mifototra ao amin’ny fahatsapantsika ny fitiavan’Adriamanitra.  Loharanom-panantenana tsy azo resena, sy loharanom-piadanam-po latsa-paka izany finoana ny fitiavan’ny Ray izany ary mbola izy ireo ihany koa mampitsimoka ao am-ponao ny fahazotoana tsy lany tovozina sy ny risi-po. (Const.4 §2). Ny hafaliana , vokatry ny fitiavan’Andriamanitra no manampy antsika hirotsaka amim-panetrentena mba hanatsara ny tontolo iainantsika, n’aiza n’aiza misy isika ary na inona ny dingam-piainana misy antsika : eo amperin’asa,  eo amin’ny trano fisotroan-dronono sy EHPAD,  marary eo ambonin’ny fandriana, eo amin’ny fianakaviana, eo amin’ireo toeram-piasana sy paroasy misy antsika…Tsy misy toerana izay tsy ahafahantsika mitondra sy mitory ny Vaovao Mahafaly.  Avelao i Jesoa Kristy hanohy ny fahatongavany ho Nofo ao amintsika. Avelao ny Fanahy  « hamolavola Azy ao amintsika » ary «  hanohy ny fiainany eto an-tany » (Boky fiainam-panahy n°43)

Enga anie ny Fankalazan’ny Noely hankahery antsika sy hamelombelona ny fanantenana ao amintsika. Enga anie ny hafalian’i Kristy hitoetra sy homba antsika mandrakariva mandritra ny Taom-Baovao.

                         Mirary soa sy mitondra anareo am-bavaka

                                     Soeur Josette Bijloos

                                  Lehiben’ny Fikambanana