Le Mans, le 4 décembre 2020

Vahoaka nandeha tamin’ny aizim-pito nahita fahazavana lehibe,

Andriamanitra mihitsy tonga namonjy azy ireo.

Cf Izaia 9,1

Ry Rahavavy sy havana aman-tsakaiza,

Ny zava-tsarotra lalovantsika izay mbola mitohy hatrany dia toy ny lalan-tsarotra mamakivaky ny aizana. Miatrika  valan’aretina sarotra fehezina isika sy herisetra tsy voafehy ary ny fahamendrehana maha olona tsy voahaja eran’ny tany... Eo anatrehan’ireo zava-miseho izay mahakivy dia tena mila fanantenana  tokoa ny olona.                                                                      

Noely dia manasa antsika miaina ny fanantenana ...

Noely, Vaovao mahafaly : ilay Andriamanitra lavitra izay nikarohin’ny olona hatramin’izay, ilay Andriamanitra tsy fantatra izay mbola andrasan'ny maro ankehitriny, dia manjary tonga akaiky antsika amin’ny alalan’ilay zazakely vao teraka voadidina lamban-jaza sy nandry ao anatin’ny fihinanam-bilona. Jesoa no anarany: Andriamanitra mamonjy, Emmanuel : Andriamanitra miaraka amintsika, loharanon'ny fanantenana rehetra.

Ny Fanantenana (Espérance) dia tsy mitovy amin'ny fanantenana (espoir). Ny fanantenana avy amin’ny olombelona  dia misy fetrany ary mety handiso. Impiry moa izany fahadisoam-panantenana izany no miafara amin'ny famoizam-po, fahantrana, fikorontanana, fikomiana, herisetra ary voina ... Manaporofo izany ny zava-mitranga sasantsasany isaky ny firenena.

Mitoetra ny Fanantenana (espérance), hery ao anaty izy. Ny Fanantenana napetrak'i Kristy ao am-pontsika amin'ny alàlan'ny fisiany dia manome antsika  ny hery ilaina handresena ireo tafio-drivotra mahery. Io Fanantenana io dia manampy antsika hiatrika ireo zava-miseho sy zava-mitranga ao anatin’ny fahatokisana mifototra amin’ny finoana, loharano manome hery sy hafaliana. Mampitoetra antsika ao anatin’ny fiadanam-po sy ny fahatoniana izy noho ny fahatsapantsika ny fisian'Andriamanitra ao amin'ny fiainantsika. Mitsimoka ao amin’ny fahatokisana an’Andriamanitra Providence izany fanantenana izany, Andriamanitra izay mikolokolo antsika no sady miantso antsika ho mpamafy Fanantenana.

Ny Papa François, rehefa niresaka ny maha zava-dehibe ny fanabeazana ho an'ny Fanantenana, dia nampatsiahy  fa ny Fanantenana dia manampy ny olona hanokatra ny fony sy hanorina tetezana eo amin’ny fifandraisana, izany hoe mba hampandroso an’izao tontolo izao. Eo amin’ny famaranana ny toko voalohany ny « encyclique Fratelli Tutti » hoy izy : ny Fanantenana dia fahasahiana, mahay mijery lavitra kokoa noho ny fitadiavana ny tombontsoa sy ny fiarovana ny tena manokana, izay mampihena ny fomba fijerintsika mba  hisokatra amin'ny idealy lehibe izay mahatonga ny fiainana ho  tena tsara sy mendrika kokoa.

Noely dia fanasana mba hanokatra ny fontsika

amin'ny tena fitiavana sy amin’ny fiombonana ao am-po ...

Amin’ny alalan’ny  fahatongavany ho nofo no anambaran’ ny Zanak'Andriamanitra fa ny famonjena dia mandalo amin’ny fitiavana, ny fandraisana sy ny fanajana ny maha-olombelona mahantra antsika izay iombonantsika amin’ny olona rehetra, samihafa foko, fiteny, sy kolotsaina  ..., kanefa mpirahalahy isika. Papa François

                                                                                         25 Desambra 2018  

Noho i Jesoa, izay tonga teo anivontsika, dia tsy misy olona vahiny ho antsika intsony fa mpiray tampo aminy isika. Tonga Izy hampianatra antsika ny fifankatiavana sy ny fiombonana ao am-po.

Zava-dehibe ny fahaizana mandray mba hidirantsika ao amin’ny misterin’ny fiombonana ao am-po.   Raha tsy mahay mandray isika dia mety hivily làlana ny fanolorantena ho an’ny hafa ka manjary fitadiavana rehareha sy fahafaham-po ho an-tena… Ireo izay afaka mandray amin-pahatsorana ihany no afaka manome amin-panetren-tena… Ny fahaizana mandray dia mampisokatra ny fontsika hahay handray ny tolotra avy amin’ny hafa… Tsy hoe : “Inona no azoko atao ho anao?” ihany fa "Inona no tianao hatao ho ahy?" mba hampisy lanja ny hafa sy manome azy ny hafaliana hampifaly, hanome sy hitia ny hafa …

Misy ambaratonga telo ny fitiavana : fitiavana filana, fitiavana fanompoana, fitiavana fanomezan-danja. Ao amin’ny fitiavana izy manoma lanja ny hafa no ahitana fiombonana ao am-po, satria fanomezana sy fandraisana izany, omeko anao ny fahatokisako, ary mandray anao amin’ny maha ianao anao fa tsy araka ny hiveriko anao.*

Nanaitra ahy ireto andalan-tsoratra manaraka ireto ary mifanohitra amin'izay  heverintsika nefa kosa manome dikany lalina ny dingana iray (fiankinana amin’ny hafa noho ny fahanterana) ao amin'ny fiainantsika izay mety hampahory antsika rehefa mieritreritra izany. Maro amintsika efa miaina izany dingana izany.

Ny fahazarana mandray izay avy amin’ny hafa dia manampy antsika hiantehitra amin’ny olona rahefa antitra na marary isika. Ny fiankinana amin’ny hafa dia mety ho toy ny fandraisana madio indrindra, izay mitaky fahatokisana tanteraka… Aza matahotra ny miantehitra amin’ny hafa ! Rehefa tsy mamela antsika hihazakazaka intsony ny tongotsika, rehefa tsy manana saina atolotra intsony isika, dia mbola manana fo afaka mandray… Raha tena miaina ny fiombonana ao am-po isika dia tsy enta-mavesatra intsony ny fianteherana amin’ny hafa rahefa antitra na marary fa manjary fomba itiavantsika hatramin’ny fara fofonaina. *  

Ny fandraisana ny fahasamihafana, dia lalana mankany amin’ny fiombonana ao am-po.

Ny fitiavana ny fahasamihafana dia tsy tongatonga ho azy. Manelingelina antsika izany ary mampatahotra antsika. Miaina ao anatin’ny fiarahamiaina miaraka amin’ireo olona tsy nofidintsika isika, izay tsy voatery manana fomba fijery toa antsika, tsy mihevitra na miasa toa antsika, olona samihafa fanabeazana sy fiofanana, samihafa fiaviana sy firenena. Manozongozona ny fiainantsika ny fahasamihafana satria mampametra-panontaniana momba ny fomba fijerintsika.

Voantso isika mba hanana fiainana anaty, hahafahantsika hihoatra ny fahasorenana, ny fitsarana an-tendrony ary ny fahatezerana (mora tohina) mba handray fanapahankevitra ny hitia… Ny miaina anaty lalina dia ny fahafantarana fa tsy afaka manova afa-tsy ny tenantsika isika, ary mandray an-kitsim-po ny antsom-pibebahana isanandro, amin’ny alalan’ny fihainoana an’Ilay malemy fanahy sy manetry tena ao am-po. Mino isika fa « ny fitoviana tanteraka dia tsy mampisy vokatra ao amin’ny fiainantsika ». Ny fifanakalozana ihany no afahana manorina. Tena ilaina tokoa ny fifandraisana amin’ny hafa... Mirosoa ary « anaty  rano lalina » ary aoka hifandray marina isika tsirairay avy, tsy mifaly fotsiny amin’ny hahandro sakafo maro loko amin’ny takarivan’ny tsingerin-taona nahaterahana, na mampiditra dihy amin’ny fanolorana ao anatin’ny litorjia-ntsika…*

Ahoana ny fomba fijerintsika ny tsirairay? Ahoana ny fomba fijerintsika ireo izay avy any an-toeran-kafa ..., fijery  manome lanja azy ireo hahafahany mandray ny tena toerany, amin'ny fombany fa tsy amin'ny fombantsika ?

Ireo andininy rehetra ireo  dia tena mifanojo marina amin’ny lohahevitra mandritra ny taona :«Ry maseran’ny Providence, iaino ny firahavaviana araky Evanjely , famantarana maha mpaminany eo amin’ny tontolo misy antsika ankehitriny »  

Banjintsika  ilay Zaza  tao Betlehema,  Fanantenantsika. Fanomezana avy amin’Andriamanitra Ray Izy izay maneho ny fahamendrehan'ny olona tsirairay.

Fandraisana sy fanomezana Izy. Ao aminy no ianarantsika ny fiombonana amin’Andriamanitra Ray sy amin’ireo rahalahy sy rahavavy. Amin’izao fankalazana ny Noely izao dia enga anie ho tsapantsika lalina fa sarobidy eo imason’Andriamanitra aho ary voaantso hiaina ny firahalahiana na inona na inona ny fiaviantsika, ny kolontsaintsika, ny fitenintsika, ny taonantsika.

Enga anie ny hafaliana sy fanantenana ny Noely

homba antsika mandritra ny taona vaovao.

Soeur Josette

* « Experts en communion ? » Sr Marie Laetitia Youchtchenko OP/ à l’Assemblée de l’UISG 2016